زاد الطلباء و الواعظین جلد دوم
زاد الطلباء و الواعظین جلد دوم
مصنف : قاری عبد الرشید اسلم
صفحات: 306
درس عربی زبان کا لفظ ہے جس کامطلب پڑھنا ہےاس کی جمع دروس ہے ۔ قرآن کریم میں اس لفظ کے متعلقات مختلف مقامات پر آئے ہیں ۔ارشاد بار تعالیٰ ہے: اَمْ لَكُمْ كِتٰبٌ فِيْهِ تَدْرُسُوْنَ (القلم:37) کیا تمہارے لیے کوئی کتاب ہے جس میں سے تم پڑھتے ہو ؟ہمارے عرف میں درس سے مراد وہ عظ وبیان ہے جو عموماً علماء کرام نمازوں کےبعد مختصر وقت کے لیے نمازیوں کی خیر خواہی کے لیے ارشاد فرماتے ہیں ۔ وعظ ودرس کے ذریعے انسانیت کی اصلاح انبیاء کی پاکیزہ سنت ہے ۔ نبی اکرمﷺ بسا اوقات نمازوں کےبعد صحابہ کرام کی طرف متوجہ ہوکر درس ارشاد فرمایا کرتے تھے ۔آپﷺ کے بعد صحابہ کرام تابعین عظام اور علماء امت نے اس سنت پر خوب عمل کیا ۔علماء کرام کے دروس پر مشتمل کئی کتب شائع ہوچکی ہیں ۔ زیر تبصرہ کتاب ’’ زادالطلباء والواعظین جلد2‘‘ قاری عبد الرشید اسلم ﷾ (آف فیروز وٹواں ضلع شیخوپورہ) کی طلباء ، خطباء ، واعظین ، دعاۃ کے لیے ایک منفرد کاوش ہے ۔فاضل مرتب نے اس کتاب میں صحیح احادیث کا مستند بہ ذخیرہ نوخیز طلباء کے لیے مرتب کیا ہے۔یہ مجموعہ اگرچہ شعبہ حفظ کے طلباء کےلیے مرتب کیا گیا ہےتاکہ شعبہ حفظ کے طلباء ایک بہترین پختہ حافظ اور اچھے قاری بننے کے ساتھ ساتھ بہترین خطیب کی صورت میں سامنے آئیں لیکن طلباء ، معلّمین، خطباء ، واعظین ، دعاۃ اس کتاب سے یکساں مستفید ہوسکتے ہیں۔ یہ مجموعہ تقاریر انتہائی مفید ، کارآمداورخاصے کی چیز ہےاور ایک قابل قدر و لائق تحسین کاوش ہے ۔ اس مجموعہ کو سامنے رکھتے ہوئے نو نہالوں کو القاء درس کی تربیت دینا بہت ہی فائد مند اور نتیجہ خیز ثابت ہوگاجس سے مستقبل میں قوم کو ایسے دعاۃ میسر آسکتے ہیں جو سلفی خطوط پر اصلاح وارشاد کے تقاضوں کو پوراکر سکیں۔ زیر تبصرہ کتاب مؤلف کامرتب کردہ دوسرا مجموعہ ہے جو کہ پچیس اہم موضوعات پر مشتمل ہے ۔ پہلی جلد بھی پچیس موضوعات پر مشتمل تھی ۔ موضوعات کا بہترین انتخاب، موضوع کے مطابق نصوص کی حسن ترتیب، دلکش اور انتہائی سہل وعام فہم اسلوب گزارش ، عناوین میں جاذبیت پیدا کرنےکے لیے استفہامیہ اسلوب ، ناصحانہ اورتاثیر میں ڈوبا ہوا طرز تحریر کتاب ہذا کی امتیازی خصوصیات ہیں ۔مولف کتاب عظیم اسلامی سکالر فضیلۃ الشیخ قاری صہیب احمد میر محمدی ﷾ (فاضل جامعہ لاہور الاسلامیہ ،لاہور ومدینہ یونیورسٹی ) کے نامور شاگرد اورکلیۃ القرآن والتربیۃ الاسلامیہ،بنگہ بلوچاں کے فاضل ہیں قاری صاحب کے ہی زیر اشراف بنگہ بلوچاں ومیر محمد میں تدریسی ودعوتی خدمات انجام دے رہے ہیں۔اللہ تعالیٰ مصنف کے زور ِقلم وبیان میں مزید اضافہ کرے اور مصنف کی اس منفرد کاوش کو شرفِ قبولیت سے نوازے اور اسے مؤلف کے لیے آخرت میں ذریعہ نجات بنائے ۔(آمین)
| عناوین | صفحہ نمبر |
| مختلف شیوخ کی نظر میں | 7 |
| تقریظ | 25 |
| چند لفظ | 27 |
| تقریر کے سبق کے متعلقہ گزارشات | 31 |
| 1)ہدایت سے محرومی کے اسباب | 31 |
| 2)کامل ایمان سے محرومی کے اسباب | 47 |
| 3) قلب سلیم سے محرومی کے اسباب | 55 |
| 4) محبت الہیٰ سے محرومی کے اسباب(1) | 66 |
| 5)محبت الہٰی سے محرومی کے اسباب(2) | 78 |
| 6) محبت الہٰی سے محرومی کے اسباب(3) | 91 |
| 7) رضائے الہٰی سے محرومی کے اسباب | 98 |
| 8) محبت مصطفی سے محرومی کے اسباب(1) | 109 |
| 9) محبت مصطفی سے محرومی کے اسباب(2) | 124 |
| 10) محبت مصطفی سے محرومی کے اسباب(3) | 133 |
| 11)نظر رحمت سے محرومی کے اسباب | 141 |
| 12)بخشش سے محرومی کے اسباب | 152 |
| 13)خیر کثی سے محرومی کے اسباب | 160 |
| 14)نفع بخش علم سے محرومی کے اسباب | 174 |
| 15)برکت سے محرومی کے اسباب | 184 |
| 16)نیکی کے اجر سے محرومی کے اسباب | 193 |
| 17)نماز کی قبولیت سے محرومی کے اسباب | 204 |
| 18)دعا کی قبولیت سے محرومی کے اسباب | 216 |
| 19)فرشتوں کی دعا سے محرومی اوران کی لعنت کے اسباب | 225 |
| 20)امن سے محرومی کےاسباب | 235 |
| 21)عزت سے محرومی کےاسباب | 241 |
| 22)نجات سے محرومی کےاسباب | 254 |
| 23)شفاعت سے محرومی کےاسباب | 263 |
| 24)جنت کی خوشبو سے محرومی کےاسباب | 271 |
| 25)جنت کے داخلے سے محرومی کےاسباب | 278 |
| المصادر والمراجع | 290 |
| اہم مسائل | 298 |